पहिलो बोली
असार १६ वालिङ उद्योग वाणिज्य संघको १९औँ साधारण सभा तथा ९औँ अधिवेशनबाट अध्यक्ष पदमा अनुपमा ढुङ्गाना तिवारी निर्विरोध निर्वाचित हुनुभएको छ।
अध्यक्ष पदका लागि अनुपमा ढुङ्गाना तिवारी र फागुपति न्यौपानेले उम्मेदवारी दर्ता गराउनुभएको थियो। तर उम्मेदवारी फिर्ता लिने प्रक्रियामा फागुपति न्यौपानेले आफ्नो उम्मेदवारी फिर्ता लिनुभएकोले तिवारी निर्विरोध निर्वाचित हुनुभएको निर्वाचन समितिले जनाएको छ।
स्रोतका अनुसार नेकपा एमाले र नेपाली कांग्रेसबीच भएको पूर्व भद्र सहमति अनुसार यस कार्यकालको अध्यक्ष पद एमाले पक्षले लिने तथा बरिष्ठ उपाध्यक्ष पद नेपाली कांग्रेस पक्षले लिने समझदारी बनेको थियो। सोही सहमतिअनुसार फागुपति न्यौपानेले उम्मेदवारी फिर्ता लिनुभएको बताइएको छ।
नवनिर्वाचित अध्यक्ष तिवारीले सम्पूर्ण व्यवसायीको साझा हितलाई केन्द्रमा राखेर संघलाई थप सशक्त, सक्रिय र व्यवसायमैत्री संस्थाका रूपमा विकास गर्ने प्रतिबद्धता व्यक्त गर्नुभएको छ। उहाँले सबै व्यवसायीको साथ, सहयोग र सुझावलाई आत्मसात् गर्दै संघको गरिमा अभिवृद्धिमा समर्पित भएर काम गर्ने बताउनुभयो।
संघको १९औँ साधारण सभा तथा ९औँ अधिवेशनअन्तर्गत अन्य पदहरूको निर्वाचन प्रक्रिया भने निर्धारित कार्यतालिकाअनुसार अघि बढिरहेको निर्वाचन समितिले जनाएको छ ।।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |