चोर सोचेर कुट्दा निर्दोषको मृत्यु

२ साउन, काठमाडौंः

बाटोमा हिँडिरहेका मानिसलाई चोरी गर्न आएको ठानेर कुटपिट गर्दा एक जना निर्दोष व्यक्तिको मृत्यु भएको छ ।

चोरी गर्न आएको ठानी सर्वसाधारणले कुटपिट गर्दा काठमाडौंको कपुरधारा बस्ने छिरिङ लामाको मृत्यु भएको हो । उनको स्थायी घर भने रसुवा रहेको प्रहरीले बताएको छ । त्यस्तै, सर्वसाधारणको कुटपिटबाट अर्का एक जना दोर्जे तामाङ नाम गरेका व्यक्ति गम्भिर घाइते भएका छन् ।

काठमाडौं प्रहरीका अनुसार हिजो राती तारकेश्वर नगरपालिकाको ५ वडामा रहेको गोलढुंगा भन्ने ठाउँमा यो घटना घटेको हो । प्रहरीका अनुसार हिजो मध्य राती दुई जना मादक पदार्थ सेवन गरेर बाटोमा हिँडिरहेका मानिसलाई देखेर कुकुर भुकेको थियो । त्यसै बिच सर्वसाधारणले उनीहरुलाई कुटपिट गर्दा एक जनाको मृत्यु भएको हो ।

घटनालाई लिएर प्रहरीले थप अनुसन्धान थालेको बताइएको छ ।