टुटल र पठाओ अवैधानिक भएको महालेखाको ठहर

३१ असार, काठमाडौँ :

अवैध रुपमा सञ्चालनमा रहेका टुटल/पठाओको सेवामाथि महालेखापरीक्षकको कार्यालयले प्रश्न उठाएको छ। महालेखापरीक्षकको कार्यालयले सार्वजनिक गरेको ५७औं प्रतिवेदनमा यातायात व्यवस्था विभागमा पञ्जिकृत भई सञ्चालन गर्नुपर्ने यस्ता सेवा पञ्जिकृत नभएको उल्लेख छ।

सवारी तथा यातायात व्यवस्था ऐन २०४९ को दफा ९३ मा यातायात सेवाको नाम विभागमा पञ्जिकृत नगरी सार्वजनिक सवारी यातायात सेवा सञ्चालन नहुने व्यवस्था छ। ‘हाल उपत्यकामा सञ्चालन भइरहेका पठाओ र टुटलजस्ता यातायात सेवा विभागमा पञ्जिकृत नगरी सञ्चालन भएको देखियो। यस्ता सवारीसाधन पञ्जिकृत गरी सञ्चालन गर्ने व्यवस्था मिलाउनुपर्दछ,’ महालेखाको प्रतिवेदनमा भनिएको छ।

यातायात व्यवस्था विभागले पटक पटक सूचना जारी गर्दै टुटल र पठाओमा रोक लगाउन खोजेको थियो। तर प्रधामन्त्री केपी शर्मा ओलीको ठाडो निर्देशनमा टुटल पठाओ चल्दै आएका छन्।