पहिलो बोली 
१९ असार, काठमाडौंः
कोरोना संक्रमणको रिपोर्ट पोजेटिभ आएको थाहा पाएसँगै एक युवकले आत्महत्या गरेका छन् । आत्महत्या गर्नेमा बझाङको खप्तडछान्ना गाउँपालिकाको वडा नम्बर ७ का उक १८ वर्षका युवक रहेका छन् । उनी होमआइसोलेसनमा बसिरहेका थिए ।
प्रहरीका अनुसार उनको हिजो बिहिबार कोरोना संक्रमणको रिपोर्ट आएको थियो । रिपोर्टमा आफूलाई कोरोना संक्रमण भएको पुष्टि भएसँगै उनले होमआइसोलेसनमा बसिरहेको आफ्नो घरबाट भागेर नजिकैको जंगलमा गएर आत्महत्या गरेका छन् ।
उनी भारतबाट गत जेठ १९ गते नेपाल आएका थिए । नेपाल आएर बझाङकै जयपुर लामागडा प्राथमिक विद्यालयमा बनाईएको क्वारेन्टाइनमा बसेका थिए । क्वारेन्टाइनबाट तीन दिन अघि मात्रै घर आएका उनी हिजो आफ्नो रिपोर्ट पोजेटिभ आएको थाहा पाएपछि आत्महत्या गरेका हुन् । गाउँपालिकाका अध्यक्ष वर्कबहादुर रोकायाका अनुसार उनले आज विहानै आत्महत्या गरेका छन् ।
