कोरोना संक्रमितको उपचार गर्ने अस्पताललाई सरकारबाट अनुदान

१७ असार, काठमाडौं:

स्वास्थ्य तथा जनसंख्या मन्त्रालयले कोरोना संक्रमित तथा शंकास्पद व्यक्तिको उपचार गरे वापत प्रतिव्यक्ति दैनिक दुई सयदेखि १५ हजार रुपैयाँसम्म अनुदान रकम सम्वन्धित संस्थालाई दिने तयारी थालेको छ ।

स्वास्थ्य मन्त्रालयले मन्त्रिपरिषदमा गरेको प्रस्ताव अनुसार सामान्य र लक्षण नदेखिएका तर आइसोलेसन सेन्टरमा रहेका संक्रमितहरुको उपचारमा २ हजार, मध्यम अवस्थामा रहेका संक्रमितको उपचारका लागि प्रतिबिरामी दैनिक ७ हजार र गम्भीर प्रकृतिका संक्रमितको उपचारका लागि दैनिक १५ हजार रुपैंयाँ अनुदान रकम सम्वन्धित अस्पताललाई उपलब्ध गराउने मन्त्रालयले जनाएको छ । त्यस्तै, सामान्य र लक्षण नदेखिएका होम क्वारेन्टाइनमा बस्दै आएकाहरुको उपचारमा भने दुई सय रुपैयाँ उपलब्ध गराउने तयारी छ ।

उक्त रकम खर्चको आधारमा सम्वन्धित संस्थालाई उपलब्ध गराउने गरी स्वास्थ्य तथा जनसंख्या मन्त्रालयले प्रस्ताव मन्त्रिपरिषदमा लगेको छ ।