२७ जिल्लामा पुग्यो सलह, सबैभन्दा ठूलो झुण्ड रुपन्देहीमा

१७ असार, काठमाडौंः

नेपालका विभिन्न २७ जिल्लामा सलह किरा फैलिएको छ ।

नेपालमा पहिलो पटक गत शनिबार सलह किराको झुण्ड देखा परेको थियो । प्लान्ट क्वारेन्टाइन तथा विषादी व्यवस्थापन केन्द्रका अनुसार मंगलबार साँझ सम्म सलहको झुण्ड विभिन्न २७ जिल्लामा पुगेको छ । यी बाहेक अन्य कतिपय जिल्लामा सानो संख्यामा पनि सलहको झुण्ड देखा परेको छ ।

केन्द्रका अनुसार शनिबार नेपालमा भारतबाट सलहका पाँच वटा बथान छिरेका थिए । नेपालमा भित्रिएका झुण्डमध्ये सबैभन्दा ठूलो झुण्ड रुपन्देहीमा देखिएको छ । रुपन्देहीमा देखिएको झुण्डमा करिब २० देखि २५ लाखसम्मको संख्यामा सलह रहेका छन् ।

त्यस्तै, मंगलबार काठमाडौं उपत्यकामा पनि सलह किरा देखा परेको थियो । काठमाडौं उपत्यकाका तीन जिल्ला ललितपुर, भक्तपुर र काठमाडौंकै आकाशमा पनि हिजो सलह देखा परेको थियो ।