भारतलाई प्रधानमन्त्रीले भनेः मलाई हटाउने नसोचे पनि हुन्छ

१४ असार, काठमाडौंः

नेपालका प्रधानमन्त्री केपी शर्मा ओलीले छिमेकी भारतलाई आफूलाई हटाउने नसोच्न चेतावनी दिएका छन् । उनले केपी ओलीको कार्यकालमा नेपालले नयाँ नक्सा छाप्यो भनेर आफूलाई प्रधानमन्त्रीबाट हटाउँछु भन्ने नसोच्न चेतावनी दिएका हुन।

मदन भण्डारीको जन्मजयन्तीको अवसरमा आइतबार बालुवाटारमा आयोजित कार्यक्रममा बोल्दै प्रधानमन्त्री ओलीले यस्तो भनेका हुन् । उनले नयाँदिल्लीका मिडिया, वौद्धिक बहस र काठमाडौंस्थित दूतावासका क्रियाकलाप र होटलहरूमा भइरहेका जमघटबाट आफूलाई हटाउन प्रयास भईरहेको समेत बताए ।

प्रधानमन्त्री ओलीले भने, ‘अघिल्लो चोटी चीनसँग पारवहन सम्झौता गर्दा मेरो सरकार ढलेको थियो तर अहिले हाम्रो बहुमत छ, आफ्नो भूमिमा दाबी गरेर नक्सा छाप्ने, यस्तो अपराध गर्ने केपी ओलीलाई हटाउँछु भन्ने कसैले नसोचे हुन्छ । कोशिस गर्नेलाई गर्न दिऔं। कसैले हतार नगरे हुन्छ। मलाई प्रधानमन्त्रीको जिम्मेवारीमा बस्न मन छैन। यतिबेला म हट्ने हो भने नेपालका पक्षमा बोल्ने मान्छे हुन्न। आजका लागि होइन भोलिका लागि। आफ्ना लागि होइन देशका लागि।’