आत्महत्या गरेका सुशान्तको जीवनमा आधारित फिल्म बन्ने

१२ असार, काठमाडौंः

केही दिनअघि आत्महत्या गरेका बलिवुडका अभिनेता सुशान्त सिंह राजुपुतको जीवनमा आधारित भएर चलचित्र बन्ने भएको छ । गत जुन १४ तारिखको दिन आफ्नै अपार्टमेन्टमा आत्महत्या गरेका सुशान्तको जीवन कथालाई लिएर केही निर्देशक तथा निर्माताले चलचित्र बनाउने घोषणा गरेका छन् ।

सुशान्तको जीवन कथालाई लिएर भारतीय चलचित्र निर्माता सामिक मौलिकले सिनेमा बनाउने घोषणा केही दिन अघि गरेका थिए । उनले सुशान्तका जीवनमा आधारित सिनेमालाई नाम समेत दिएका छन । सुशान्तको जीवनमा आधारित सिनेमाको नाम ‘सुशाईड और मर्डर’ रहने उनले बताए ।

त्यस्तै, अर्का भारतीय निर्देशक सनोज मिश्रले पनि सुशान्तको जीवनमा आधारित भएर चलचित्र लेख्न सुरु गरेको बताएका छन् । उनले सुशान्तको वायोपिक नभएर मुम्बई आएर संघर्ष गर्ने र सफल हुने बेलामा आत्महत्या गर्नेको कथालाई लेखेको बताएका छन् । सुशान्तको जीवन कथामा आधारित मिश्रको सिनेमाको नाम पनि ‘सुशान्त’ नै राखिने भएको छ ।