दीपक मनाङेको राजिनामा, भनेः लाज लागेर राजिनामा दिएँ

०८ असार, काठमाडौंः

सांसद राजीव गुरुङ्ग अर्थात दीपक मनाङेले प्रदेशसभाको अर्थ तथा विकास समितिबाट राजिनामा दिएका छन् । आफूले समितिमा बसेर काम गर्न नसकेकाले राजिनामा दिएको उनले बताएका छन् ।

मनाङेले सांसदको रुपमा बस्न आफूलाई लाज लागेकाले राजिनामा दिएको बताए । उनले भने, ‘जताततै भ्रष्टचार छ । समितिको जिम्मेवारी पनि केही पुरा भएको छैन । कामै नलाग्ने समितिमा किन बस्नु? मलाई त लाज लागेर राजिनामा दिएँ ।’ मनाङेले समितिमा बसेर आफूले अनियमितता मात्रै देख्नु परेकाले राजिनामा दिएको बताए ।

आफ्नो प्रदेश सभामा ठूलो भूमिका नै नपाएको मनाङेले बताए । उनले भने, ‘दलले भने अनुसार मात्रै गर्नुपर्छ । आफ्नो मौलिक भूमिका नै छैन ।’ मनाङे फौजदारी संहिताविपरीत अभद्र व्यवहार गरेको आरोपमा पक्राउ परेका थिए । उनलाई प्रशासनले गत १२ माघमा ६ हजार रुपैयाँ धरौटीमा रिहा गरिएको थियो ।