डेढ वर्षका बालकले जिते कोरोना

८ असार, काठमाडौंः

विरगञ्जमा एक जना डेढ वर्षका बालकले कोरोना भाईरसको संक्रमणलाई परास्त गर्न सफल भएका छन् । वीरगञ्जस्थित नारायणी उपक्षेत्रीय अस्पतालमा रहेको गण्डक कोभिड अस्पतालमा उपचारर रहेका उनले कोरोना भाइरसलाई परास्त गरेर सोमबार डिस्चार्ज भएका हुन् । उनीसँगै ११ जना संक्रमितलाई अस्पतालले सोमबार डिस्चार्ज गरेको छ ।

अस्पताल प्रशासनका अनुसार कोरोनामुक्त भएर डिस्चार्ज हुनेहरुमा सखुवाप्रसौनीका डेढ वर्ष र ३ वर्षका दुई जना बालक रहेका छन् । त्यस्तै, ३० वर्षीया एक जना महिलाले पनि कोरोना भाइरसको संक्रमणलाई जित्न सफल भएकी छिन् । गत जेठ ३० कोरोना संक्रमणको पुष्टि भएसँग उनीहरु अस्पतालमा भर्ना भएका थिए । क्वारेन्टाइनमा बस्दा बालकलाई ज्वरो आएपछि परिक्षणमा कोरोना भाइरस देखिएको थियो ।

‘तीनै जना सखुवा प्रसौनीस्थित क्वारेन्टिनमा ५ दिन बसेका रहेछन् । संक्रमण पुष्टि भएपछि अस्पतालको आइसोलेसनमा ६ दिनबसेपछि उनीहरुको पीसीआर परीक्षण गरेका थियौं,’ गण्डक कोभिड अस्पतालका संयोजक डा. उदय नारायण सिंहले भने ‘जसको रिपोर्ट नेगेटिभ आएपछि उनीहरुलाई डिस्चार्ज गरेका हौं ।’

त्यस्तै, अन्य डिस्चार्ज हुनेहरुमा जगरनाथपुर गाउँपालिकाका–६ का २५ वर्षीया एक जना महिला र २० देखि ५५ वर्षका सात जना पुरुष छन् ।