भारत चीन विवादबारे छलफल गर्न भारतीय प्रधानमन्त्री मोदीले बोलाए वैठक, २० दलका नेता सहभागी हुँदै

०५ असार, काठमाडौंः

भारतीय प्रधानमन्त्री नरेन्द्र मोदीले चीनसँग पछिल्लो समयमा जारी सीमा विवाद तथा आफ्ना सेना मारिएको विषयमा छलफल गर्न शुक्रबार भारतका सबै राजनीतिक दलहरुको संयुक्त बैठक बोलाएका छन् ।

प्रधानमन्त्रीले शुक्रबार अपराह्न ५ बजेका लागि सो भर्चुअल बैठक बोलाउनुभएको प्रधानमन्त्रीको कार्यालयद्धारा जानकारी गराइएको छ । सो बैठकमा भारतका प्रमुख राजनीतिक दलहरुका अध्यक्षहरुको सहभागिता रहने बताइएको छ । भारत र चीनबीचको लद्दाखस्थित ग्वालन भ्यालीलीमा यही जुन १५ को राति भारत र चीनका सीमा सुरक्षा सैनिकबीच झडप भएको बताइएको थियो ।

त्यस झडपमा भारतका कम्तीमा पनि २० जना सैनिकको ज्यान गएको भारतले जनाएको छ । उक्त हिंसापछि भारत र चीनबीच सीमा विवाद बढ्दो रहेको देखिएको छ । यी दुई देशकाबीचमा सीमा क्षेत्रको विषयलाई लिएर भएको हिंसाप्रति संयुक्त राष्ट्रसंघले पनि चासो व्यक्त गरेको बताइएको छ ।

सीमामा भएको यो हिंसाप्रति संयुक्त राष्ट्रसंघका महासचिव एन्टोनियो गुटर्रेसले पनि चासो व्यक्त गर्नुभएको थियो । भारत र चीनबीचको सीमामा भएको विवाद र सैनिक झडपमा परी भारतीय सैनिकको ज्यान गएको घटनाबारे उहाँले चासो व्यक्त गर्नुभएको हो ।

साथै संयुक्त राष्ट्रसंघका महासचिव एन्टोनियो गुटर्रेसले सो विषयमा वार्ताको माध्यमबाट विवादको समाधान खोज्नका लागि पनि हालैमात्र आह्वान गर्नुभएको थियो ।

प्रधानमन्त्री मोदीले आयोजना गरेको बैठकमा भारतका २० दल सहभागी हुने जनाइएको छ । बैठक शुक्रबार बेलुका पाँच बजे शुरु हुने जनाईएको छ । केन्द्रिय गृहमन्त्री अमित शाह, रक्षा मन्त्री राजनाथ सिंह, सत्तारुढ दल भारतीय जनता पार्टीका अध्यक्ष जगत प्रकाश नन्दलगायत पनि बैठकमा सहभागी हुने कुरा रहेको छ ।

जानकारीअनुसार प्रधानमन्त्री मोदीको सिफारिसमा भाजपाका पूर्व अध्यक्ष सिंहले बिहीबार पार्टीका नेताहरुलाई निमन्त्रणा गरेका छन् । राष्ट्रियतासंग सम्बन्धित संवेदनशील र महत्वपूर्ण विषयमा पनि सरकारले पर्याप्त चासो र सक्रियता नदेखाएको र अन्य पार्टीहरुसँग छलफल तथा सहकार्य गर्न नखोजेको भन्दै आलोचनापछि उक्त बैठक आयोजन हुन लागेको छ ।

विषेश गरी आम आद्मी पार्टी, आरजेडीलगायतका पार्टीले दबाव दिएपछि सर्वदलिय बैठक बस्न लागेको समाचारमा जनाइएको छ । यही जुन १५ देखि १६ तारिख सम्ममा लद्दाखस्थित ग्वालन भ्यालीलीमा दुई देशका सैनिकहरुका बीचमा झडप भएको र भारत तर्फका कम्तीमा २० सैनिकको मृत्यु भएको थियो ।

सो झडपका क्रममा भारतीय सेना तर्फका कोही पनि बेपत्ता भने नभएको पनि भारतीय सेनाले स्पष्ट पारेको छ ।