पहिलो बोली 
३१ जेठ, काठमाडौंः
संविधान संशोधन विद्येयन सर्वसम्मत रुपमा पारित भएको छ । संविधानको निसाना छापमा रहेको नक्सा संशोधनका लागि सरकारले दर्ता गराएको संविधानको दोस्रो संसोधन विधेयक शनिबार प्रतिनिधिसभाबाट सर्वसम्मत रुपमा पारित भएको हो ।
संशोधनको पक्षमा कुल २५८ मत परेको छ भने विपक्षमा शून्य मत परेको छ । सभामुख अग्निप्रसाद सापकोटाले विपक्षमा शुन्य मत परेको बताउँदै विधेयक सर्वसम्मत रूपमा पारित भएको घोषणा गरेका छन्।
प्रतिनिधिसभाले संविधानको अनुसूची ३ को व्यवस्थालाई संशोधनका लागि सरकारले प्रतिनिधि सभामा पेश गरेको थियो। सरकारले प्रस्तुत गरेको सो संशोधन विधेयक शनिबार प्रतिनिधि सभामा छलफल पछि सर्वसम्मत पारित भएको हो।
विपक्षमा एक मत पनि नपर्दै संशोधनको सो प्रस्ताव पारित भएको छ । नेपालका सबै राजनैतिक दलका उपस्थित सांसदहरु संविधान संशोधन प्रस्तावको छलफलमा उपस्थित भएको थिए । तर, बेग्लै संशोधन विधेयक दर्ता गरेकी सरिता गिरी भने छलफलमा सहभागी भइनन्।
संशोधनको विषयमा सभामा भएको छलफलपछि कानुनमन्त्री शिवमाया तुम्बाहाङ्फेले सांसदहरुले उठाएका प्रश्नहरुमा जवाफ दिएकी थिइन्। तुम्बाहाङ्फेको जवाफपछि सभामुख अग्नि सापकोटाले संविधान संशोधनको प्रस्तावलाई अङ्ग बनाउने प्रक्रिया पूरा गरेका हुन् । प्रक्रियामा सबैको सहमति भएसँगै सभामुख सापकोटाले पुनः कानुनमन्त्रीलाई संशोधन पारित गरियोस् भन्ने प्रस्ताव राख्ने अनुमति दिएका थिए।
प्रतिनिधि सभाबाट स्विकृत भएको प्रस्ताव राष्ट्रियसभाबाट समेत स्वीकृत भएपछि राष्ट्रपतिले प्रमाणित गरी राजपत्रमा प्रकाशित हुनुपर्छ । त्यसपछि, संविधान संशोधनको प्रक्रिया पूरा हुने छ । राजपत्रमा प्रकाशित भएसँगै नेपालको नयाँ नक्साले औपचारिक रूपमा नै मान्यता समेत पाउनेछ।
