सरिता गिरीको घरमा युवाहरुले राखे कालो झण्डा

२९ जेठ, काठमाडौं:

पछिल्लो समय नेपालको नक्सा र सिमानाको विषयमा दिएको अभिव्यक्तिका कारण विवादमा आएकी समाजवादी पार्टीकी सांसद सरिता गिरीको घरमा बुधबार कालो झण्डा राखिएको छ । उनको विशालनगरस्थित घरमा बुधबार साँझ युवाहरुको एक समूहले कालोझण्डा राखेको थियो । प्रहरीले उनको घरमा राखेको कालोझण्डा हटाएको छ ।

महानगरिय प्रहरी परिसर काठमाडौंका अनुसार गिरिको घरमा कालोझण्डा राख्ने समूहको पहिचान भएको छैन् । प्रहरीले यो घटनाले गिरीमाथि सुरक्षा खतरा निश्कर्ष निकालेको छ ।

कालोझण्डा राखेको सूचना अएपछि प्रहरी टोली पुगेको काठमाडौंका प्रहरी प्रमुख श्याम ज्ञवालीले बताए । उनले भने, ‘यस विषयमा थप अनुसन्धान भईरहेको छ ।’

सरकारले लिम्पियाधुरासहितको नेपालको नक्सा जारी गरेपछि निशान छापमा पनि सो अद्यावधिक नक्शा राख्नका लागि सरकारले संविधान संशोधन विधेयक प्रतिनिधिसभामा दर्ता गरेको छ । तर, सांसद सरिता गिरीले स्रोत र प्रमाण नपुगेको भन्दै संशोधन प्रस्ताव खारेज गर्न अर्को संशोधन प्रस्ताव दर्ता गराएकी छन् । उनले गरेको यस्तो अभिव्यक्तिलाई लिएर अहिले सामाजिक सञ्जालमा आलोचना भएको छ । सत्तारुढ नेपाल कम्युनिस्ट पार्टीको युवा संगठनले पनि सांसद गिरीलाई कारबाही गर्न माग गरेको छ ।

गिरी आबद्ध राजनैतिक पार्टी समाजवादी पार्टीले पनि उनलाई सो प्रस्ताव फिर्ता लिन आग्रह गरेको छ । पार्टीले गिरीलाई प्रस्ताव फिर्ता नलिए कारबाही गर्ने चेतावनी दिएको छ ।