गोरखा जिल्लामा पहिलो पटक १० जना कोरोना संक्रमित भएको पुष्टि

२५ जेठ, गोरखा:

गोरखा जिल्लामा पहिलो पटक कोरोना संक्रमण भेटिएको पुष्टि भएको छ । आइतबार बिहान गण्डकी गाउँपालिकामा ९ जना र पालुङटार नगरपालिकाका एक जनामा कोरोना संक्रमण भएको पुष्टि भएको हो ।

संक्रमितमध्ये गण्डकी गाउँपालिकाका संक्रमितहरु २० देखि ४३ वर्ष उमेर समूहका रहेका छन् । त्यस्तै, पालुङटार नगरपालिकाका संक्रमित १७ वर्षीय युवक रहेका छन् । थपिएका संक्रमितमध्ये ९ जना क्वारेन्टाइनमा बसिरहेका थिए । एक जना भने प्रहरी हिरासतमा रहेको खुलेको छ । जेठ २० गते नमुना संकलन गरेर पिसिआर परिक्षणका लागि पोखरास्थित जनस्वास्थ्य प्रयोगशाला पठाईएको थियो ।

संक्रमितमध्ये ८ जना भारतबाट आएको प्रमुख जिल्ला अधिकारी सुरेन्द्र पौडेलले बताए । पौडेलका अनुसार संक्रमितहरुलाई जिल्ला अस्पताल गोरखाको आइसोलेसन वार्डमा ल्याउने तयारी भइरहेको छ ।