बैतडीका १९ जना स्वास्थ्यकर्मी क्वारेन्टिनमा

२४ जेठ, काठमाडौंः

बैतडी जिल्ला अस्पतालमा कार्यारत रहेका १९ जनालाई क्वारेन्टिनमा राखिएको छ । अस्पतालमा सुत्केरी भएकी एक महिलाको आरडिटी पोजेटिभ आएपछि ती महिलाको सम्पर्कमा रहेका १९ स्वास्थ्यकर्मीलाई सेल्फ क्वारेन्टिनमा राखिएको हो । उनीहरु क्वोन्टिनमा राखिएसँगै अस्पतालको सेवा पनि प्रभावित भएको छ ।

उच्च ज्वरोसँगै कोरोना संक्रमणका शङ्कास्पद लक्षण देखिएकी ती महिलाको आरडिटी परिक्षण गर्दा रिपोर्ट पोजेटिभ देखिएको थियो । उनीसँग प्रत्यक्ष सम्पर्कमा रहेका १९ स्वास्थ्यकर्मीलाई त्यसपछि सेल्फ क्वारेन्टिनमा राखिएको जिल्ला अस्पताल बैतडीका प्रमुख डा वसन्तराज जोशीले जानकारी दिए ।

जेठ २० गते राति शल्यक्रियामार्फत जिल्ला अस्पतालमै बच्चा जन्माएकी दोगडाकेदार–६ सित्तड घर भएकी ती महिलामा बुधबार जाँच गर्दा १०५।१ डिग्री फरेनहाइट ज्वरो देखापरेपछि आरडिटी गरिएको थियो। नवजात शिशुको भने आरडिटी रिपोर्ट नेगेटिभ आएको छ । प्रमुख डा जोशीले भने, ‘अस्पतालमा आउने अरु बिरामी जाँच र अरुको सम्पर्कमा नजाने गरी सेल्फ क्वारेन्टिनमा बस्न भनेका हौं ।१९ स्वास्थ्यकर्मीले क्वारेन्टिनमा बस्दा सेवा पनि प्रभावित भएको छ, ती महिलाको पिसीआर पोजेटिभ आयो भने झनै समस्या हुने देखिन्छ ।’

आरडिटी पोजेटिभ आएपछि उक्त महिलाको स्वाब संकलन गरि पिसिआर परिक्षणका लागि धनगढि अस्पताल पठाईएको छ । नजिका पर्खिरहेकी महिला अहिले जिल्ला अस्पतालकै आइसोलेसनमा राखिएको छ ।