लक्षण नदेखिएका र स्वास्थ्यमा समस्या नभएका कोरोना संक्रमितलाई अस्पतालले फर्काउन थाल्यो

२४ जेठ, काठमाडौंः

विभिन्न अस्पतालमा उपचाररत रहेका कोरोना संक्रमणका बिरामीलाई घर फर्काउन थालिएको छ । कैलालीको धनगढी–१४ का २२ वर्षीया युवती, २६ वर्षीय युवक र घोडाघोडी नगरपालिकाका संक्रमित पुरुषलाई सेती अस्पतालले आइसोलेसनमा नराखी फिर्ता पठाएको हो। कोरोना पुष्टि भए पनि लक्षण नदेखिएको भन्दै सेती प्रादेशिक अस्पतालले आइसोलेसनमा नराखी संक्रमितलाई फिर्ता पठाएको खुलासा भएको छ ।

बिहीबार कोरोना भाइरसको संक्रमण पुष्टि भएका धनगढीका २६ वर्षीय संक्रमित युवकलाई हिजो सेती प्रादेशिक अस्पताल लगिएको थियो । अस्पतालमा लगिए पनि त्यसपछि केही जानकारी नै नदिई फेरि क्‍वारेन्टाइनमा फिर्ता पठाइएको उनले बताएका छन् । उनले भने, ‘हिजो बिहान एम्बुलेन्समा सेती अस्पताल लगिएको थियो । हामीलाई अस्पताल पुर्‍याएपछि एक पटक एम्बुलेन्सबाट समेत नझारी पुनः क्‍वारेन्टाइनमा ल्याएर छाडिएको छ ।’

सक्रमित युवकका अनुसार एम्बुलेन्स चालकले औषधि खानु भनेर दिएका छन् । अर्कि कोरोना संक्रमित युवती र आफूलाई सँगै राखिएको उनले बताए ।

सेती अस्पतालबाटै कुनै पनि लक्षण नदेखिएको बन्दै होम क्वारेन्टाइनमा बस्न भनि घोडाघोडी नगपालिकाका संक्रमितलाई फिर्ता पठाएको छ। अस्पतालका अनुसार स्वास्थ्य मन्त्रालयले जारी गरेको निर्देशिकामा उल्लेख भए अनुसार लक्षण नभएका र सामान्य लक्षण देखिएका बिरामी फिर्ता पठाईएको हो । अस्पताललले उनीहरुलाई घरमा नै आइसोलेट भएर बस्नु भनि पठाएको छ ।

सेती अस्पतालले हिजो मात्रै ६ जना कोरोना संक्रमितहरूलाई १४ दिन आइसोलेसनमा राखेर रिस्चार्ज गरेको थियो। डिस्चार्ज हुनेमा एकै घरका बाबु र छोरीसहित अरू चारजना थिए। अस्पतालले अछामको मेल्लेख गाउँपालिकाका ३२ बर्षीय पुरुष र उनकी ११ वर्षीया छोरी, बैतडीको शिवनाथ गाउँपालिका वडा नम्बर १ का २० र २७ वर्षीय पुरुष तथा शिवनाथ गाउँपालिकाकै वडा नम्बर २ का २० र २२ वर्षीय पुरुषलाई डिस्चार्ज गरेको थियो। कोरोना मुक्त नभएका उनीहरु अस्पतालमा उपचाररत थिए । तर, अस्पताल प्रशासनले भने स्वास्थ्य मन्त्रालयले दिएको नयाँ निर्देशिका अनुसार काम गरेको बताएको थियो ।

नयाँ निर्देशिकामा संक्रमित व्यक्तिहरूमा कुनै लक्षण नदेखिएको र स्वास्थ्य समस्या नभएका संक्रमितलाई १४ दिन आइसोलेसनमा राखेर डिस्चार्ज गर्न मिल्ने उल्लेख गरिएको छ । अस्पतालका सूचना अधिकारी दीलिप श्रेष्ठका अनुसार नयाँ व्यवस्था अनुसार उनीहरुलाई डिस्चार्ज गरिएको हो । अस्पतालले डिस्चार्ज दिएपनि उनीहरु घर फर्किएर जान सक्ने अवस्था नभएकाले फेरि प्रि–आइसोलेसनमा भर्ना गरिएको थियो ।

स्वास्थ्य तथा जनसंख्या मन्त्रालयले २० जेठमा जारी गरेको नयाँ निर्देशिकामा कुनै लक्षण नदेखिएका संक्रमितहरूलाई १४ दिनपछि घरमै आइसोलेसनमा बस्‍नेगरी चिकित्सकले डिस्चार्ज गर्न सक्ने उल्लेख छ। सोही व्यवस्थामा टेकेर अस्पतालले कोरोना संक्रमणमुक्त नभएका बिरामीलाई पनि घर र क्‍वारेन्टाइनमा बस्‍न भन्दै फर्काउन थालेको छ।