युरोपमा खुकुलो बन्दै लकडाउन

२०७७–०२–२०/काठमाडौं– अहिले विश्वभर नै कोरोना भाईरसको महामारी फैलिएको छ । विश्वका प्रायः देशहरुमा यो महामारीले असर गरिरहेको छ । धेरै देशहरुले कोरोना भाईरसलाई नियन्त्रण गर्नका लागि लक डाउन गरेका छन् । यस्तोमा युरोपका केही देशहरुले भने कोरोना भाईरस नियन्त्रणका लागि जारी गरेको लक डाउनलाई सोमबारबाट केही खुकुलो बनाएका छन् ।

बिबिसि, सिएनएनजस्ता अन्तराष्ट्रिय सञ्चारमाध्यमहरुमा युरोपका धेरै मुलुकहरुमा लक डाउन हटाउने काम भएको उल्लेख गरेका छन् । कतिपय देशहरुले जारी भएको लक डाउनलाई पूर्ण रुपले हटाएका छन् भने कतिपयले यसलाई केही खुकुलो बनाएर विस्तारै क्रमशः लक डाउन खोल्ने तयारी गरिरहेका छन् ।
युरोपेली देश ग्रिसमा गत मे २५ तारिखबाटै रेष्टुरेन्ट तथा क्याफेहरु खुल्ला गरिएको थियो ।अहिले भने ग्रिसमा केही सिमित संख्यामा अन्तराष्ट्रिय हवाई उडानलाई पनि अनुमति दिने तयारी भएको छ । आगामी जुन १५ तारिखबाट विभिन्न १९ देशबाट आउने पर्यकहरुलाई ग्रिसमा आउन दिने तयारी भएको छ भने आगमी महिना जुलाईको १ तारिखबाट उडानलाई थप खुकुलो बनाउने तयारी भईरहेको छ । यसरी ग्रिसमा आउने पर्यटकलाई हवाई उडानमा खुकुलो गरेतापनि कोरोना परिक्षण गर्नुपर्ने र केही दिनलाई क्वारेन्टाइनमा बस्नुपर्ने निति बनाईएको छ ।

त्यस्तै, अर्को युरोपेली देश फ्रान्समा पनि मंगलबारबाट रेष्टुरेन्ट तथा क्याफेहरु खुल्ने भएका छन् । क्याफे तथा रेष्टुरेन्ट खुलेतापनि सामाजिक दुरी भने अनिवार्य रुपमा पालन गर्नुपर्ने नियम बनाईएको छ । गत शनिबार देखि फ्रान्सका विभिन्न स्थानमा पार्क तथा खुल्ला चौरहरुमा आवतजावत खुल्ल गराईएको छ । मंगलबारबाट लक डाउनलाई खुकुलो बनाउने फ्रान्समा एक ठाउँमा १० जनाभन्दा बढि मानिसलाई भेला हुनबाट भने रोक लगाईएको छ ।

कोरोना भाईरसले निकै प्रभावित भएको युरोपेली देश इटलीमा आगामी बुधबारबाट अन्तराष्ट्रिय हवाई उडान खुकुलो गरिएको छ । जारी गरिएका लक डाउनलाई केही मात्रामा खुल्ला गर्ने निर्णय इटलीमा भएको छ । देशभरका विभिन्न ठाउँहरुमा भ्रमणलाई पनि अनुमति दिईएको छ । स्पेनमा भने सोमबाट देखिनै आधाभन्दा धेरै ठाउँहरुमा लकडाउनलाई खुकुलो गरिएको छ । सोमबार बाट नै स्पेनमा लक डाउनले प्रभावितमध्ये ७० प्रतिशतभन्दा बढि मानिसहरुका लागि लक डाउन खुकुलो गर्ने निर्णय भएको छ । स्पेनमा सिमित संख्यामा रेष्टुरेन्ट खोल्न दिने, सिनेमा घरहरुमा सामाजिक दुरी कायम गरेर सञ्चालन गर्न दिने तथा विभिन्न मल र संग्राहलयहरुमा पनि सिमित संख्यामा कम मानिसलाई जान मिल्ने गरि व्यवस्था गरिएको छ । एक ठाउँमा बढिमा १५ जनालाई मात्रै भेला हुन दिने गरि लक डाउनलाई खुकुलो बनाईदैं छ । विभिन्न ठाउँमा लक डाउन खुकुलो हुने भएतापनि स्पेनको राजधानी मड्रिडमा भने जारी भएको लक डाउनलाई यथावत राखिने भएको छ ।

अर्को युरोपेली देश इङ्ल्याण्डमा सोमबारबाट सामाजिक दुरीलाई कडाईका साथ पालन गर्दै लक डाउनलाई केही खुकुलो बनाईएको छ । बढिमा ६ जनासम्मले एक ठाउँमा भेला हुन पाउने नियम बनाउँदै इङ्गल्याण्डमा जिम, पार्क, विद्यालय लगायतका ठाउँहरुलाई निश्चित दुरी कायम गर्दै सिमित संख्यामा मानिसको आवतजावत गराउने अनुमति दिईएको छ ।