काठमाडौं- कोरोना भाइरसको इपिसेन्टर मानिएको चीनको वुहानबाट नेपाल ल्याइएका नेपालीहरु सबैमा भाइरसको संक्रमण नरहेको पाइएको छ। आइतबार वुहानबाट १७५ जनालाई नेपाल ल्याइएको थियो। स्वास्थ्य मन्त्रालयले आयोजना गरेको पत्रकार सम्मेलनमा उनीहरुको नाक र घाँटीबाट स्याम्पल(नमुना) लिएर परीक्षण गरिएको र त्यसको रिपोर्ट ‘नेगेटिभ’ पाइएको जानकारी दिइयो।
अहिलेसम्म नेपालमा २१० जनाको कोरोना संक्रमण भए नभएको परीक्षण गरिएको मन्त्रालयका प्रवक्ता महेन्द्रप्रसाद श्रेष्ठले बताए। परीक्षण गरिएका मध्ये एक जनाको मात्र रिपोर्ट पोजेटिभ आएको र उनी अहिले स्वस्थ भएर घर फर्किसकेका छन्।
